HUMOR DAN LAWAK BATAK TAPANULI
"tuiiit.. tittittuiii..t, tuit.., tuit"Holan sullim ma dipaullus ullus si Ogol ganup ari huhut marmahan hambing. Molo diullus si Ogol sulim na i, sipata ma dialus alusi hambing i, "tuttuiiit.., tuit, tuit" ninna sullim ni si Ogol, "humbeee..., humbee.." ninna hambing i ma marganti ganti, sampulu godang ni hambing i.
Molo marsullim si Ogol di toru ni hau, adong ma sada hambing nasai mampanotnoti si Ogol on.
"idageee Ogol, bagianmi.., angka daknanak na asing, leptop, enpon, ipad, andoroid, pesbuk, tuiter, bebeem, angka i nama meam meam na, ia ro ma ho Ogol bolon, lalap ma holan paullus ullus sullim" ninna rohani hambing i huhut sai geleng geleng kepala menatap si Ogol na lagi asik mangullus sulim na.
Hape tarbege ni si Ogol na dibagas roha ni hambing i, hira sinetron na di tipi tipi i, manghatai dibagas roha alai gogo hian soarana.
"ima dah" ninna rohani si Ogol, sai dirimang rimangi ibana huhut dibollang ibana hambing i. Kau ejek daku, dikau hina diri ini, paima, ninna rohani si Ogol.
Mamolus ma tongke hambing, pintor dijual ibana hambing na sai mengejek i, massam massam kau, ninna rohana. "humbee.., humbee.." tangis ma hambing i.
Dung botari, mulak ma ibana sian parmahanan, hambing nga moru sada, sian sampulu gabe sia. Disangaja ibana ma mulak antar golap ari. "boasa golap ho mulak Ogol?" ninna Nai Ogol. "lalap manggagati hambingta on oma, sai huarihon mulak, dang olo, manggagat torus, berengma, kan nga mokmok mokmok hambing ta on" ninna si Ogol mangalusi. "pamasuk ma" ninna Nai Ogol maandok pamasuk tu bara.
Somal na dietong (dikira) do molo laho pamasuk tu bara, ai maos curiga do Nai Ogol, sotung dijual hambing i.
"Oma, hitung atrek jo tabahen sahali on da.., asa songon na mantaf!" ninna si Ogol. "maksudmu?" ninna Nai Ogol. "sian sampulu jo parjolo, sia.." ninna si Ogol meyakinkan. "lomom ma" ninna Nai Ogol huhut bangga ibana, nga tamba jenius si Ogol bolon na dodong on, ninna rohana.
Di togu ma hambing i sisada sada huhut dikira laho pamasuk tu bara. "sampulu..." ninna si Ogol huhut dipamasuk hambing i sada. "ok" ninna Nai Ogol. "sia.., uwalu, pitu, onom..", "oke, lanjut" ninna Nai Ogol. Di paonomhon, pintor busisaon ma si Ogol, pura pura laho miting. "boasa busisaon ho?" ninna Nai Ogol. "hassit butuhangku Oma, naeng miting hian ahu, dang tahan be ahu" ninna si Ogol. "aiyabaghh, lao ma ne.., unang miting ho di salawarmi. Nga piga nangkin masuk? Ninna Nai Ogol mandok hambing naung dipamasuk ni halak i. "nga onom Ma" ninna si Ogol huhut sai ditiop i butaha na.
"ooo.., opat nai ate, sada, dua, tolu, opat. Opat tamba onom sama dengan sampulu, hmm.. oke.. nga pas be" ninna Nai Ogol huhut mangkira hambing na diluar na so dipamasuk i dope. "pintor maridi ho, hatop ho da, asa mangan hita, manengket manuk ahu" ninna Nai Ogol, pintor maringkati si Ogol, aman dan nyaman ninna rohana.
"Oma.., annon marnipi ahu" ninna si Ogol tu Nai Ogol tingki mangan.
"oee Ogol anak ni Amangmu, dang modom dope, nag marnipi ho, aha naeng nipim?" ninna Nai Ogol huhut mangharat ulu ni manuk.
"marnipi ahu annon, mago sada hambingta, dibuat panangko.." ninna si Ogol. "nararat do nipim" ninna Nai Ogol.
Marsogot nai, dipakaluar ma hambing i sian bara laho tu parmahanan. Di kira Nai Ogol ma hambing i, "bah bah, mago sada hambing ta on Ogol" ninna Nai Ogol sai longang. "toho do nipingki kan Oma" ninna si Ogol.
Beberapa hari kemudian, manuhor enfon layar tulluk ma si Ogol hasil penjualan hambing. Dibahen ma akun pesbuk na, dibahen ma propilna bekerja di ladang Tuhan. Dang mangullus ullus sullim be ibana marmahan hambing, nga manulluk nulluk enfon.
Haha.., sai na adong do...
(test hamu hitung mundur ni si Ogol i ate, unang holan dijaha jaha hamu, jari tangan muna i bahen, molo so i, pake anak ni korek)
BY Ayah Anre Simarmata -
HUMOR DAN LAWAK BATAK TAPANULI
Tidak ada komentar:
Posting Komentar